Enugwu-Ukwu echiela Okeke Ezuo II

0
1212
Nkem Okeke
Osote gọvanọ Anambra, Dokịnta Nkem Okeke (n'aka ekpe) na nwanne ya nwoke bụ Chukwuemeka Okeke, na mmemme ahụ.

OSOTE aka na-achị steeti Anambra bụ Dọkịnta Nkem Okeke abụrụla onye  chiri echichi dịka ‘Ezuo Nke Abụọo’ n’Enugwu-Ukwu na Ụmụnri, bụkwa echichi nke e chibụrụ nna ya lagoro mmụọ.

Ya bụ nnukwu echichi bụ nke ndị obodo Enugwu-Ukwu nile zukọtara wee chibe ya, bụkwa nke e mere site n’aka eze ọdịnala obodo ahụ, bụ Igwe Ralph Ekpe. Nke a bụ nke e mere na mmemme Ịgụ Arọ nke iri isii, bụ out n’ime nnukwu mmemme pụrụ iche e jiri mara ndị obodo ahụ, ma bụrụkwa nke weere ọnọdụ n’obi eze dị n’Obu Ụmụnri n’okpuru ọchịchị Njikọka nke steeti Anambra.

Mmemme ahụ bụ nnọọ nke kpoghaara ọkụ site n’iji ọtụtụ ọnụ mkpọnala dara ụda nke ukwuu wee sị Igwe Ralph na ndị ichie ya ‘nnọọ’ dịka ha ji Ịgba Eze na egwu Ufie wee na-abata. Ngwa ngwa nke ahụ gasịrị, ịgọ na ịwa ọjị sochiri, bụkwa nke e butere site n’aka ndị Iyom, Otu Odu na Eze, bụ ndị nwunye Igwe duru wee bịa.

Ka ọ na-echibe Dọkịnta Okeke ya bụ echichi, Igwe Ralph kọwara ya dịka nwoke nwere obi umeala na onye metagooro obodo ahụ ọtụtụ ihe otutu n’ụzọ dị iche iche, ma mee ka a mara na echichi ahụ bụ nnọọ nke kwesiri ekwesi maka na ọ bụ ihe onye na-eme ka obodo ji ekwupuru ya.

Nkem Okeke
Osote gọvanọ Anambra, Dokịnta Nkem Okeke (n’aka ekpe) na nwanne ya nwoke bụ Chukwuemeka Okeke, na mmemme ahụ.

Nwunye Dọkịnta Okeke, bụ Oriakụ Oby Okeke bụkwa onye a nọrọ n’otu oge ahụ chibe echichi dịka “Anya Di Ya” n’ihi ọtụtụ ụzọ dị iche iche o si akwàdo di ya n’ihe dị iche iche ọ na-eme.

Ka ọ na-agwa ndị nta akụkọ okwu oge ọ natachara ya bụ echichi, Dọkịnta Okeke gosipụtara obi añụrị ya banyere ya bụ nnukwu nkwanye ugwu ma kọwaa ya dịka ụzọ e si eme ka ihe nna ha lagoro mmụọ mepụtara dịgide. O kelere Chineke nna na ndị obodo ahụ maka nke ahụ, ma kpọkuziekwa ụfọdụ ndị mmadụ ndị na-ahụta ụdị ihe ahụ dịka ikpere arụsị ma dụọ ha ka ha kwụsị nke ahụ n’ihi na ihe ahụ bụ nnọọ ezigbo omenala Igbo kwesiri ka a na-akwalite ya nke ukwuu na oge niile.

N’okwu nke ha n’otu n’otu, Oriakụ Oby Okeke na nwanne Nkem Okeke bụ Mazị Emeka Okeke kwuru na echichi ahụ bịara nnọọ n’oge kwesiri ekwesi ma sịkwa na ezinaụlọ ndị be Okeke nile jiri obi ụtọ wee na-anabata nke ahụ.

Ndị ukwu ndị ukwu sonyere na mmemme ahụ gụnyere osote gọvanọ steeti Imo, ogbo ya nke Enugu nakwa nke Ebonyi, ndị selitere isi n’otu pati APGA, otu onye ụlọ ọgbakọ omebe iwu etiti bụ Senator Ben Obi, Mazị Victor Oye, onyeisi ụlọ mgbasaozi ABS bụ nze Uche Nwọra na ọtụtụ ndị ọzọ.

AHAPỤ A ZARA

Please enter your comment!
Please enter your name here