Ezinaụlọ na ọdịmma ụwa nile

0
3153
Ezinaụlọ na ọdịmma ụwa nile
Ezeokafor nke St Anthony's Parish Enugwu-Ukwu

Chinwendu Uzoatu

 

EZINAỤLỌ bụ ewumewu nke zuru ụwa nile ọnụ. Ọ bụ nke a mere mba ụwa ji wepụta nwanne ụnyahụ bụ Tuzdee, ọnwa Mee a dị na mkpụrụ ụbọchị iri na ise dịka ụbọchị e jiri cheta ezinaụlọ n’ụwa nile ‘World Family Day’.

Dịka m kwuru na mbụ, ezinaụlọ zuru ụwa nile ọnụ makana ọ bụ na ya ka mmadụ nile si pụta. Onye ọ bụna bụ mmadụ nwere ezinaụlọ o si pụta. Ezinaụlọ nile bụ otu mana nghọta ndị ọcha dị iche na nghọta ndị Igbo n’ihe gbasara ezinaụlọ. Nke a mere na e nwere ụdị ezinaụlọ atọ: ezinaụlọ otu mkpuke, ezinaụlọ ubara mkpuke na ezinaụlọ mgbasa.

Ezinaụlọ otu mkpuke bụ ezinaụlọ ndị mejupụtara ya bụ nke a na-ahụtakari n’obodo ndị ọcha. Nke a pụtara na ọ bụ ụdị ezinaụlọ a ka ndị ọcha na-enwekari. Ezinaụlọ ụbara mkpuke bụ ezinaụlọ nwoke nwe ụlọ na-alụ karịa otu nwanyị. Ezinaụlọ mgbasa bụ nke gụnnyere di, ndị nwunye na ụmụaka, nne di, nna di, ikwunibe ma tinyekwara ndị ọgọ.

 

Ọ bụ ụdị ezinaụlọ a ka ndị Igbo na-enwe. Ezinaụlọ ndị Igbo na-enwe ngalaba, ọ bụ ewumewu nwoke nwere nnukwu ọnọdụ na ndụ ndị Igbo. Ebe ndị ọcha na-eme ezinaụlọ otu nwoke na nwanyị na ụmụ ha, ndị Igbo na eme ezinaụlọ otu nwoke, igwe nwanyị, ụmụ ha na ikwunibe ha. Usoro ndị a nile bụ ezinaụlọ dịka ndị siri nabata.

Ezinaụlọ bụ isi a hụrụ kwaba okpu na ndụ ndị mmadụ maka na onye ọ bụna bụ mmadụ si n’ime ezinaụlọ pụta. Mmekọrita mmadụ na ibe ya na-ebido n’ezinaụlọ.

Ma nne ma nna ma ụmụaka nwere ọlụ dịịrị ha n’ezinaụlọ nke onye ọ bụna n’ime ha ga-arụrịrị nke ya ihe e wee na-aga n’usoro ya.

GUO:  Ezinaụlọ

Ụkoọchukwu Callistus Nwachukwu Ezeokafor nke ‘St Anthony’s Catholic Church’, Enugwu-Ukwu, n’okwu ọ gwara ndị nta akụkọ kọwara ezinaụlọ dịka ewumewu nke Chineke hibere nke nzụkọ doro nsọ. Ọ kọwara na Chineke bụ onye ọ bụ uche ya na ezinaụlọ ga-adị n’ụwa.Ọ rụtụrụ aka n’akwụkwọ nsọ ebe Chineke kwuru na Genesis isi nke abụọ na ọ dịghị mma ka nwoke nọrọ sọ ya.

Ọ gara n’ihu kwuo na nzukọ na-edo ezinaụlọ nsọ site na di na nwunye ịgba akwụkwọ. O kwuru, ma a mụtara nwa, ma a mụtaghị na ezinaụlọ ka bụkwa ezinaụlọ. O ji ezinaụlọ dị asọ wee nye ihe mgbakwasa ụkwụ dị mma ya bụ ezinaụlọ Jesu, Mary, na Joseph. Ọ kọwara na ma nne, nna na ụmụaka nwere ọlụ dịịrị ha n’ezinaụlọ. Na ọ bụ aka nri kwọọ aka ekpe, aka ekpe a kwọọ aka nri.

Gbasara ajụjụ a jụrụ ya maka ịgba alụkwaghịm, ọ rụtụrụ aka n’akwụkwọ nsọ Mathew, isi nke iri na iteghete. Ọ kọwara na alụmalụ di na nwunye bụ ọkpụkpọ oku na ọ bụghị enyi, tinyere na e nweghị ezi nghọta na-ekewa di na nwunye.
‘Fr’ Ezeokafor gara n’ihu kwuo na ụfọdụ ndị mmadụ na-elegara anya n’ihe a na-ahụ anya ma ha chọba ịlụ di na nwunye, ihe dịka mma na ego, nke a-adịghị adịgide. Ọ rụtụkwara aka na ‘I Peter’, isi nke atọ. O kwuru ka ndị mmadụ chọọ mma nke dị n’ime, nke a naghị ada ada.

N’ikpeazụ, ọ dọrọ nne na nna aka na nti ka ha leruo ụmụ ha anya. Ọ gwara ha na ụwa dị mma bụ na ezinaụlọ dị mma, na ụwa dị njọ bụ na ezinaụlọ dị njọ. Ọ duru ha ọdụ ka ha leruo anya wee rụọ ọlụ Chineke keere ha n’ebe ụmụaka nọ na n’ebe Chineke nọ.

GUO:  Nne na nna: Olee onye ka mkpa n'ezinaụlọ?

Ọtụtụ ndị mmadụ tinyekwara ọnụ n’okwu kwuru ka ọha na eze nwee ihunanya, ndidi, mụọ mgbaghara ka ezinaụlọ wee bụrụ eji ama atụ.

AHAPỤ A ZARA

Please enter your comment!
Please enter your name here